УИХ: Төрийн эзэмшлийн хувь хэмжээг тусгай АМНАТ-өөр орлуулах боломжийг хуульд тусгасан

Цөмийн энергийн тухай хуульд нэмэлт өөрчлөлт оруулах болон хамт өргөн мэдүүлсэн хуулийн төслүүдийг УИХ-аар эцэслэн баталлаа.

Төрийн эзэмшлийн 34 хувийг Ашигт Малтмалын Нөөц Ашигласны Тусгай (АМНАТ) төлбөрөөр орлуулах, энгийн хувьцааг давуу эрхийн хувьцаа болгох боломжийг хуульд тусгасан байна. Тодруулбал: АМНАТ нь суурь, тусгай, өсөн нэмэгдэх нөхцөлтэй байна. Суурь АМНАТ нь борлуулалтын үнэлгээний таван хувь байх бол ордын онцлогийг харгалзан тусгай АМНАТ таван хувь, өсөн нэмэгдэх нь зах зээлийн үнээс шалтгаалаад 0-9 хувь байхаар тусгалаа.

Энгийн хувьцааг давуу эрхийн 10 хувийн хувьцаа болгосноор Монгол Улс ямар нэг санхүүгийн хариуцлага хүлээхгүй, ногдол ашгаа давуу эрхтэй хүртэх юм. Мөн хөрөнгө оруулалтын гэрээг 20 хүртэлх жилээр сунгасан. Уурхайн хаалтын дараах засвар, нөхөн сэргээлтэд зарцуулах хөрөнгийг Монголбанк дахь валютын тусгай дансанд байршуулж, зөвхөн зориулалтын дагуу ашиглах зохицуулалт орууллаа.

Хуульд байгаль орчин, ус ашиглалт, хог хаягдлын менежментийн талаар нарийн зохицуулалт дутмаг байгааг зарим гишүүд шүүмжилж, гэрээ байгуулахдаа анхаарах шаардлагатайг тодотгож байна.

Хууль баталсны дараа хөрөнгө оруулалтын гэрээний асуудал яригдаж, УИХ-аар хэлэлцүүлнэ гэдгийг ЗГХЭГ-ын дарга мэдээллээ. “Orano Mining”-тай 2025 оны нэгдүгээр сард багтаан гэрээ байгуулахаар төлөвлөж байгааг салбарын сайд мэдээлсэн юм.