АХБ болон Засгийн газрын хамтран хэрэгжүүлэх төслийн хүрээнд Чингэлтэй дүүрэгт шинэ эмнэлэг барьж, Ховд аймгийн эмнэлгийг шинэчилж, өргөтгөнө

Азийн Хөгжлийн банк Монгол Улсад уур амьсгалын хөрөнгө оруулалтыг эрчимжүүлэх, иргэдийн орлогод нийцсэн, чанартай эрүүл мэндийн үйлчилгээг сайжруулах чиглэлд 182.2 сая ам.долларын санхүүжилттэй хоёр төсөл хэрэгжүүлэхээр болов. Төслүүдийг Засгийн газартай хамтран хэрэгжүүлэхээр гэрээ байгууллаа.

Азийн Хөгжлийн банкны Суурин төлөөлөгч Шэннон Коулин “Эдгээр төсөл нь Монгол Улсын хөгжлийг илүү тогтвортой, уян хатан, хүртээмжтэй болгох чиглэлд хийж буй чухал алхам болох”-ыг онцолж байна.

Эмзэг бүлгийн иргэдийн эрүүл мэндийн тусламж үйлчилгээний хүртээмжийг сайжруулах хөрөнгө оруулалтын хөтөлбөрийн II үе шат болох 82.2 сая ам.долларын төсөл нь хот, хөдөөгийн анхан шатны эрүүл мэндийн тусламж үйлчилгээг бэхжүүлэх, аймаг, дүүргийн эмнэлгийн үйлчилгээг сайжруулахад чиглэнэ.

Төслийн хүрээнд Чингэлтэй дүүрэгт шинэ эмнэлэг барьж, Ховд аймгийн одоо байгаа эмнэлгийг шинэчилж, өргөтгөхөөр төлөвлөжээ.

Мөн Улаанбаатар хотын гэр хорооллын бүсэд өрхийн зургаан шинэ эмнэлэг, сумын эрүүл мэндийн нэг төвийг байгуулах юм байна. Төслийн хүрээнд сонгогдсон эмнэлгүүдэд яаралтай тусламжийн тоног төхөөрөмж нийлүүлж, анхан шатны эрүүл мэндийн санхүүжилт, боловсон хүчин, худалдан авалтын системийг шинэчилж, нэгдсэн эрүүл мэндийн үйлчилгээний загварыг хэрэгжүүлэхээ мэдээллээ.

Харин 100 сая ам.долларын бодлогын зээл болох Уур амьсгалын хөрөнгө оруулалтыг эрчимжүүлэх хөтөлбөр нь “Үндэсний хэмжээнд тодорхойлсон хувь нэмэр” болон “Үндэсний дасан зохицох төлөвлөгөө”-ний хүрээнд уур амьсгалын зорилтуудаа биелүүлэх Монгол Улсын чадавхыг бэхжүүлэх бөгөөд жендерийн мэдрэмжтэй үйл ажиллагааг дэмжих юм байна.

Уур амьсгалын хөрөнгө оруулалтыг эрчимжүүлэх чиглэлд сэргээгдэх эрчим хүчний үйлдвэрлэлийг дэмжиж, барилгын салбарын эрчим хүчний хэрэглээний үр ашгийг дээшлүүлэх, уур амьсгалд тэсвэртэй хөдөө аж ахуй, мал аж ахуй, хүнсний боловсруулах үйлдвэрлэлийг хөгжүүлэх зэрэг арга хэмжээ хэрэгжүүлэхээр төлөвлөжээ. Мөн ногоон бонд гаргаж, банкны салбарын ногоон зээлийн багцыг нэмэгдүүлэх юм байна.