Шинэжинст - Нарийн сухайтын нүүрс тээврийн зам хүртэл 295.1 км автозамын зураг төсөв, ТЭЗҮ-ийг “Сэкер ресорсус монголиа” ХХК-иас аймгийн ЗДТГ-т хүлээлгэн өглөө.

Баянхонгор аймгийн Шинэжинст сумын Хотгорын уурхайгаас Өмнөговь аймгийн Гурвантэс сумын Нарийнсухайтын нүүрс тээврийн зам хүртэлх 295.137 км авто замын нарийвчилсан зураг, төсөв, ТЭЗҮ болон холбогдох бичиг баримт ийнхүү бэлэн болжээ.

Тус компани нь 2024 оны наймдугаар сарын 7-ны өдөр Зам, тээврийн яамтай тусгай зориулалтын авто зам барих, ашиглах гэрээ байгуулсан байна. Гэрээний хүрээнд "Сэкер ресорсус монголиа" ХХК Баянхонгор аймгийн Шинэжинст сумын Хотгорын уурхайгаас Өмнөговь аймгийн Гурвантэс сумын Нарийнсухайтын нүүрс тээврийн зам хүртэлх авто замыг өөрийн хөрөнгө оруулалтаар барьж ашиглалтад оруулан улсад хүлээлгэн өгөх юм.

Тус замыг 100 хувь хувийн хөрөнгө оруулалтаар тавих хамгийн урт зам бөгөөд Зам тээврийн яамнаас авто зам, замын байгууламжийн барилгын ажлыг эхлүүлэх зөвшөөрлийг 2024 оны 11 дүгээр сарын 13-ны өдөр авсан байна. Компани тусгай зориулалттай авто замыг 12 сарын хугацаанд барьж ашиглалтад оруулахаар төлөвлөжээ.