2024 оны эцсийн байдлаар “Petro Matad”-ийн бэлэн мөнгөний нөөц 2.5 сая ам.доллар байна гэж тооцоолжээ

Лондоны Хөрөнгийн биржид бүртгэлтэй “Petro Matad” компанийг харьцангуй сайн жил угтахаар байгааг Англид төвтэй “Progressive Equity Research” байгууллага мэдээллээ.

Хоёр жил Төрийн хүнд сурталтай нүүр тулж, газар олголт болон зөвшөөрөл авахад сорилтуудтай тулгараад байсан тус компани энэ оны аравдугаар сард газрын тосны олборлолтоо эхлүүлсэн юм.

Ингэснээр бэлэн мөнгөний урсгалтай болж, газрын тосны “Heron” талбайгаа илүү хурдацтайгаар хөгжүүлж, олборлолтоо нэмэгдүүлэх боломж нь бүрдэж байна гэж үзжээ.

2024 оны эцсийн байдлаар “Petro Matad” компанийн бэлэн мөнгөний нөөц 2.5 сая ам.доллар байна гэж тооцоолсон байна. Энэ нь 2025 оны бизнесийн төлөвлөгөөгөө болон сэргээгдэх эрчим хүчний чиглэлд төлөвлөсөн төслүүдээ санхүүжүүлэхэд ашиглагдах боломжтой гэж тодотгожээ.

Мөн түүхий газрын тосыг БНХАУ руу тээвэрлэх зардал өндөр байгаа нь компанийн хувьд тулгарах гол сорилтуудын нэг болж байгааг дурдсан байна. Монголын газрын тос боловсруулах үйлдвэр 2026 онд ашиглалтад орох хүртэл энэ нь компанийн санхүүгийн байдалд хүндрэлтэй хэвээр байхыг дурдсан байна.