Инфляц өндөр хэвээр байх төлөвтэй гэж эдийн засагчид үзэж байна
Улсын хэмжээнд инфляц энэ оны I улиралд 10.1 орчим хувьтай байх бол оны эцэст бага зэрэг саарч, 9.7 орчим хувь болох төлөвтэйг эдийн засагчид, шинжээчдийн дунд явуулсан Монголбанкны судалгаа харууллаа.
Эдийн засагчид өмнөх улирлуудад инфляц оны эхний улиралд 7.8 орчим хувьтай байна гэж төсөөлж байсан ч энэ удаа төсөөллөө ийнхүү ахиулав. Нэгдүгээр сарын байдлаар инфляц улсын хэмжээнд 9.6 хувьтай гараад байгаа юм.
Инфляц энэ онд Төв банкны зорилтот 6+- түвшнээс өндөр байхаар байгааг Монголбанк мэдээлж байсан юм. Ийнхүү инфляц хоёр оронтой тоо руу дөхсөнөөр Төв банк  бодлогын хүүг хоёр нэгж хувиар огцом нэмж, 12 хувьд хүргээд байна.
Цахилгааны үнийн өсөлтийн дам нөлөө, махны үнийн өсөлт болон ирэх тавдугаар сард дулааны үнэ нэмэгдэхээх байгаа зэрэг нь инфляцад дарамт болох эрсдэлтэй гэж үзэж байна.
Харин Төв банк энэ оны эдийн засгийн төсөөллөө 7-8 хувь хэвээр үлдээгээд байгаа юм. Хэдийгээр нүүрсний экспортын үнэ буурч буй ч “Оюутолгой” төслийн нөлөөгөөр уул уурхайн үйлдвэрлэл идэвхжих, хөдөө аж ахуйн салбар сэргэх, томоохон төслүүдийн бүтээн байгуулалт нь барилга, үйлдвэрлэл, тээврийн салбарыг дэмжинэ гэсэн хүлээлттэй байгааг Монголбанкны Ерөнхийлөгч онцолж байсан юм.
Харин шинжээчид дотоодын нийт бүтээгдэхүүний жилийн өсөлт оны эцэст 5.4 хувь байна гэж төсөөлсөн байна.

Нийтэлсэн огноо2025-03-13