Санхүүгийн тогтвортой байдлын зөвлөлийн ээлжит бус хуралдаан өчигдөр болжээ. Тус хуралдааныг Сангийн сайд Б.Жавхлан даргалж, Монголбанкны ерөнхийлөгч Б.Лхагвасүрэн, Санхүүгийн зохицуулах хорооны дарга Т.Жамбаажамц, Хадгаламжийн даатгалын корпорацийн гүйцэтгэх захирлын үүрэг гүйцэтгэгч С.Баатарсүрэн болон бусад холбогдох албан тушаалтнууд хуралдаанд оролцсон байна. Уг хуралдаанаар Монгол Улсын гадаад валютын албан нөөцийг нэмэгдүүлэх чиглэлд авч хэрэгжүүлэх арга хэмжээний тухай хэлэлцжээ. Засгийн газраас хэрэгжүүлэхээр төлөвлөж буй “Алт-3" аяны хүрээнд олон улсын зах зээлээс урьдчилгаа санхүүжилт татах талаар хэлэлцсэн байна.
Монгол Улсын банк, санхүүгийн байгууллагуудын гадаад зах зээлд байршуулсан нөөцийг дотоод эдийн засагт татаж байршуулан эдийн засгийн эргэлтэд оруулах, үүнтэй уялдуулан Төсвийн тухай хуулийн хүрээнд Засгийн газрын дотоод үнэт цаас гаргах талаар шийдвэрлэжээ. Энэ хүрээнд Хадгаламжийн даатгалын корпорацийн эзэмшиж буй Засгийн газрын гадаад бондыг үнийн хэлбэлзэл үүсгэхгүйгээр арилжаалж, чөлөөлөгдөх гадаад валютын нөөцийг дотоод зах зээлд оруулж ирэх зөвлөмжийг Санхүүгийн тогтвортой байдлын зөвлөлөөс Хадгаламжийн даатгалын корпорацид хүргүүлэхээр шийдвэрлэсэн байна.

Нийтэлсэн огноо2025-03-26