Агаарын тээврийн зорчигчийн тоо 15.3 хувиар өсжээ
Агаарын тээврээр оны эхнээс өссөн дүнгээр 437.2 мянган зорчигч тээвэрлэсэн нь өмнөх оны мөн үетэй харьцуулахад 15.3 хувиар өссөнийг Зам, тээврийн яам мэдээллээ. Энэ онд агаарын тээврээр 2.3 сая зорчигч тээвэрлэх зорилт тавьснаас 19 хувийн гүйцэтгэлтэй байна. Харин нислэгийн гүйцэтгэл өмнөх оны мөн үеэс 21 хувиар нэмэгджээ.
Энэ он гарсаар хоёрдугаар сарын 24-нөөс гуравдугаар сарын хоёрны өдөр хүртэлх долоо хоногийн хугацаанд 30.4 мянган зорчигч агаарын тээврээр олон улсад зорчсон бол гуравдугаар сарын 17-23-ны өдрүүдэд орон нутгийн чиглэлд 8.9 мянган хүн зорчсон нь хамгийн их дүн болж байна.
Тайлант хугацаанд агаарын тээврээр 1.8 мянган тонн ачаа тээвэрлэсэн нь өмнөх оны мөн үеэс 8.5 хувиар буурчээ.
Зуны улирлын хугацаанд олон улсын нислэгт нийт 17 агаарын тээвэрлэгчийн 10 мянга 116 нислэг үйлдэхээр төлөвлөсөн нь 2024 оныхтой харьцуулахад 8.9 хувиар өсөхөөр байгааг ИНЕГ мэдээлсэн юм.
Аялал жуулчлалын салбарыг дэмжихээр Засгийн газар гаднын улсуудтай агаарын харилцааны хэлэлцээр байгуулж, шууд нислэг үйлдэх боломж бүрдүүлэх ажлыг эрчимжүүлж байгааг салбарын яам тодотгож байв. Сүүлд Итали болон Кувейт улстай агаарын харилцааны тухай Засгийн газар хоорондын хэлэлцээр байгуулсан бөгөөд ингэснээр 40 гаруй улстай агаарын харилцааны хэлэлцээр байгуулаад байна.
Үүнээс гадна “Чингис хаан” олон улсын нисэх буудлыг өргөтгөх ажлыг Япон улстай хамтран хэрэгжүүлэхээр төлөвлөж байгаа ба энэ хүрээнд тус улсаас иений хөнгөлөлттэй зээл авахаар хэлэлцэж байгаа аж.

Нийтэлсэн огноо2025-03-27