“Цагаан алт” хөтөлбөрийн үр дүнд ноолуурын бүрэн боловсруулалтын түвшнийг хоёр дахин, ноосныхыг 25 хувиас 55 хувь хүртэл нэмэгдүүлэхийг зорьж байна
“Цагаан алт” хөтөлбөрийг 2028 он хүртэл хэрэгжүүлэх нийт төсөв 2.1 их наяд төгрөг байхаас 682.4 тэрбум төгрөгийг улсын төсвөөс санхүүжүүлэхээр төлөвлөснийг Монголбанкны тайланд тодотгосон байна. Улсын төсвийн санхүүжилт нь зээлийн хүүгийн татаас, дэд бүтцийн бүтээн байгуулалтууд, салбарын стандартыг сайжруулах болон хүний нөөцийг чадавхжуулахад түлхүү зарцуулагдана. Энэ онд 221.5 тэрбум төгрөгийг улсын төсвөөс санхүүжүүлэхээр төлөвлөөд байгаа аж. Хөтөлбөрийн хугацаанд арилжааны банкнуудын эх үүсвэрээр нийт 1.51 их наяд төгрөг олгох тооцоо гарчээ.
Хөтөлбөрийн хүрээнд эргэлтийн болон хөрөнгө оруулалтын зээлийг 2-4 жилийн хугацаатай олгож байна. Засгийн газар 9-10 хувийн хүүгийн хөнгөлөлт үзүүлж байгаа бол аж ахуйн нэгжүүд ногоон зээлд зургаан хувь, энгийн зээлд 7-9 хувийн хүү төлөх тооцоо байгааг ХХААХҮЯ танилцуулсан юм. Аж ахуйн нэгжүүдийн төлөх хүүгийн хэмжээ бодлогын хүүнээс хамаарч өөрчлөгдөх боломжтой гэдгийг тодотгож байлаа.
Хөтөлбөрийн хүрээнд энэ онд нийт 788.9 тэрбум төгрөгийн зээл олгохоос гуравдугаар сарын 31-ний байдлаар нийт 207.6 тэрбум  төгрөгийн зээл баталж, 98.2 тэрбум төгрөгийг нь олгоод байгаа аж.
“Цагаан алт” хөтөлбөрийн үр дүнд  ноолуурын бүрэн боловсруулалтын түвшнийг хоёр дахин, ноосныхыг 25 хувиас 55 хувь хүртэл нэмэгдүүлэхийг зорьж байна. Мөн арьс шир боловсруулалтыг 30 хувиас 50 хувь хүртэл нэмэгдүүлнэ.
2022 оны байдлаар Монгол Улс дэлхийн түүхий ноолуурын хэрэглээний 45 хувийг, ноосны хэрэглээний 0.51 хувийг хангаж байжээ. Малын гаралтай түүхий эдийн нөөц ихтэй ч түүхий эд бэлтгэх үед стандарт хангадаггүй,  боловсруулалтын шатанд технологийн хүчин чадал дутмаг зэрэг шалтгаанаар нэмүү өртөг шингэсэн бүтээгдэхүүн үйлдвэрлэл тааруу байгааг тус судалгаанд тодотгожээ.

Нийтэлсэн огноо2025-04-08