Дотоодын үйлдвэрлэгчид хонины ноос, яс зэргээр органик бордоо үйлдвэрлэн, зарим аж ахуйн нэгж Европ болон АНУ-д экспортолж байна

Монгол Улсад жилд дунджаар 200 мянга гаруй тонн бордооны хэрэглээ байдгаас 95 орчим хувийг нь импортоор авч байна. Үндэсний үйлдвэрлэгчид нийт 10 мянга гаруй тонн бордоо үйлдвэрлэх хүчин чадалтай ч зах зээлийн эрэлтээс шалтгаалан бүрэн хүчин чадлаараа ажиллахгүй байгааг тодотгож байна.

2024 онд 244 мянган тонн бордоог 72.6 сая ам.доллароор импортолсон нь өмнөх оноос биет хэмжээ нь 60 хувиар, үнийн дүн нь 33 хувиар өссөнийг Гаалийн ерөнхий газрын мэдээллээс харж болохоор байна.

Харин Монгол Улсаас ургамал, мал амьтны гаралтай 107 тонн шимт бордоог 174 мянган ам.доллароор экспортолжээ. Биет хэмжээний хувьд өмнөх оноосоо 54.4 хувиар нэмэгдсэн байна. Импортын бордооны дийлэнх хувийг химийн буюу азотын бордоо эзэлж байгаа аж.

Дотоодын үйлдвэрлэгчид хонины ноос, яс зэргээр органик бордоо үйлдвэрлэн, зарим аж ахуйн нэгж Европ болон АНУ-д экспортолж байна.

Дотоодын үйлдвэрлэлийг нэмэгдүүлэхийн тулд органик бордооны давуу талыг тариаланчдад таниулах нь чухал байгаа. Мөн үндэсний үйлдвэрлэгчдээс бордоо худалдан авсан тариаланчдад олгох бордооны урамшууллыг нэмэгдүүлэх, импортын бордоонд квот тогтоох зэрэг бодлогын дэмжлэг шаардлагатай байгааг үйлдвэрлэгчид онцолж байна.