“Атар-4” тариалангийн тогтвортой хөгжлийн аяны хүрээнд 800 тэрбум төгрөгийн хөнгөлөлттэй зээл олгохоор төлөвлөжээ
Энэ онд 655 мянган га талбайд тариалалт хийхээр төлөвлөж байгаагаас, стратегийн хүнс болох улаанбуудайн тариалалтыг 360 мянган га-д хийхээр төлөвлөж байгааг Хүнс, Хөдөө Аж Ахуй, Хөнгөн Үйлдвэрийн Яам мэдээллээ. Өнгөрсөн онд нийт 632.7 мянган га-д тариалалт хийснээс 3.5 хувиар өсөх тооцоололтой байна.
Хаврын тариалалт эхлэхээс өмнө импортын гурил, малын тэжээлийн гаалийн татварыг тэглэсэн тогтоолыг хүчингүй болгох шаардлага байгааг салбарын яам тодотгож байв. Үүнээс улаанбуудай тариалалтын хэмжээ шалтгаалахаар байгааг онцолж байна.
Засгийн газраас хэрэгжүүлэхээр зарлаад буй “Атар-4” тариалангийн тогтвортой хөгжлийн аяны хүрээнд энэ онд 800 тэрбум төгрөгийн хөнгөлөлттэй зээл олгохоор төлөвлөжээ. Аяныг хэрэгжүүлэх хугацаанд улсын төсөв, арилжааны банкнууд болон олон улсын байгууллагуудын эх үүсвэрээр нийт гурван их наяд орчим төгрөгийн зээл олгохоор тооцоолж байгааг мэдээллээ. Аяны үр дүнд 200 мянган га талбайг шинээр эргэлтэд оруулахыг зорьж байна. 
Үүнээс гадна өнгөрсөн оны эцсийн мал тооллогын дүн дээр үндэслэн энэ онд 8.5 мянган тонн ноолуур, 34.2 мянган тонн ноос, 17.2 сая ширхэг арьс шир бэлтгэх төлөвтэй байгааг салбарын сайд танилцууллаа.

Нийтэлсэн огноо2025-04-08