Тодруулбал, Шинэ Төв цэвэрлэх байгууламжийн дэргэд Хаягдал ус дахин боловсруулах үйлдвэр байгуулахаар болсонтой холбогдуулан дахин боловсруулсан усыг “ДЦС-3”, “ДЦС-4” ТӨХК-ууд руу дамжуулах шугам хоолойг угсрах тул Яармагийн гүүрийг Ажилчдын гудамжтай холбосон 500 метр авто замыг хаахаар болжээ. Өөрөөр хэлбэл, Хан-Уул дүүргийн III хороо ДЦС-3 ТӨХК-иас баруун тийш Яармагийн гүүрийг Ажилчдын гудамжтай холбосон автозамыг өнөөдөр буюу дөрөвдүгээр сарын 11-ний өдрийн 06:00 цагаас эхлэн дөрөвдүгээр сарын 14-ний өдөр хүртэл гурав хоног хаахаар болсон байна.
Энэ хугацаанд Яармагийн гүүрнээс Ажилчдын гудамж буюу ДЦС-3 ТӨХК-ийн баруун хойд талын буцаж эргэдэг тойрог хүртэл урдаас хойшоо зөвхөн нэг чиглэлд зорчих аж.  Харин хойноос урагш чиглэлийг ДЦС-3 ТӨХК-ийн баруун хойд талын буцах уулзвараар эргэж, ДЦС-3 ТӨХК-ийн хойд болон зүүн талын замаар үндсэн хөдөлгөөнд оролцох боломжтой байхаар хөдөлгөөнийг түр зохицуулж байгаа юм байна.
Төсөл хэрэгжсэнээр дулааны цахилгаан станцууд уг цэвэрлэсэн усыг техникийн хэрэглээндээ ашиглаж, гүний цэвэр усны хэрэглээг жилд 18 сая хүртэл шоо метрээр бууруулах юм. Өөрөөр хэлбэл “ДЦС-3”, “ДЦС-4” ТӨХК нь жилд Дөргөн нуурын устай дүйцэхүйц хэмжээний усыг хэрэглээд хаядаг гэсэн тооцоо судалгаа бий.
Харин “ДЦС-3”, “ДЦС-4” ТӨХК руу ус дамжуулах шугам хоолой татсанаар энэ хэмжээний усыг Улаанбаатар хотод аварч үлдэх боломжтой болж буй. Ингэснээр хойч үедээ үлдээх усны нөөцөө нэмэгдүүлж байгааг албаныхан онцлов.

Нийтэлсэн огноо2025-04-11