Өмнөх оны гуравдугаар сард 6.2 хувь байснаасаа 2.9 нэгж хувиар эрчимжсэн байна
Хэрэглээний үнийн индекс улсын хэмжээнд гуравдугаар сарын эцэст өмнөх сараас 0.3 хувиар өссөнөөр жилийн 9.1 хувьтай гарсныг Үндэсний статистикийн хороо мэдээллээ. Өмнөх оны гуравдугаар сард жилийн инфляц 6.2 хувь байсантай харьцуулахад өсөлтийн хурд өмнөх оны мөн үеэс 2.9 нэгж хувиар эрчимжсэн байна.
Бензин, түлшнээс бусад импортын барааны үнэ 2.8 нэгж хувиар, мах хатуу түлшнээс бусад дотоодын бараа, бүтээгдэхүүний үнэ таван нэгж хувийн нөлөө үзүүлжээ. Мөн орон сууц, ус цахилгаан түлшний бүлгийн үнэ 22.6 хувиар буюу хамгийн өндөр дүнгээр нөлөөлсөн бол холбооны хэрэгсэл шуудангийн үйлчилгээний үнэ өөрчлөлтгүй байлаа.
Инфляц 2025 оны туршид хоёр оронтой тоонд хадгалагдаж болзошгүй гэж эдийн засагчид анхааруулж буй. Мөн цахилгааны үнийг нэмэгдүүлсэн шийдвэрээс инфляцад үзүүлэх нөлөөлөл 2025 оны 11 дүгээр сар хүртэл хадгалагдах төлөвтэйг Монголбанк сүүлийн мэдэгдлээрээ онцолж байв. Эрчим хүчний зохицуулах хороо тавдугаар сард дулааны үнийг 75-100 хувиар нэмэхээр тооцоолж байсныг Засгийн газар хойшлуулах шийдвэр гаргасан юм.
Түүнчлэн гуравдугаар сард импортын бараа, бүтээгдэхүүний инфляцад үзүүлэх нөлөө буурч, 9.1 нэгж хувийн 2.5 нэгж хувийг бүрдүүлснийг Үндэсний статистикийн хороо тайлагнасан байна. Ерөнхий индексийг бүлгээр нь авч үзэхэд үйлчилгээний үнийн индекс 16.6 хувьтай буюу хамгийн өндөр, хүнсний бус барааны индекс 9.5 хувьтай гарсан бол хүнсний үнийн индекс 8.2 хувиар өссөн байна.
Азийн Хөгжлийн Банк шинэ төсөөллөөрөө 2025 оны эцэст Монгол Улсын инфляц 9.1 хувьд хадгалагдах хүлээлттэй байгаагаа мэдээлсэн юм. Үүнд Засгийн газрын зарлагын өсөлт, эдийн засгийн идэвхжил, эрчим хүчний үнийн өсөлтөөр тайлбарлагдана гэж танилцууллаа.

Нийтэлсэн огноо2025-04-11