Ерөнхий сайдын хүүгийн тансаг хэрэглээний асуудал газар авч, төв талбайд залуус “Орлогоо нотол”,“Огцрох амархан” уриатай жагсаал 20 гаруй хоног болсон. Улмаар Л.Оюун-Эрдэнийн Засгийн газар огцроод буй. Ингэж жагсагчдын “огцрох амархан” уриалга үр дүнд хүрсэн ч “орлого нотлох” асуудал нь үргэлжилж байна. Энэ нь хуулийн байгууллагаас шалтгаалах асуудал.
Иймд Ерөнхий сайдын хүүгийн орлогоо нотлох асуудлыг эргэн сануулж, шалгалтын ажиллагаа хэрхэж буй талаарх мэдээллийг хөндлөө.
-Өмнөх үйл явдлыг сануулах нь-
Найз охиндоо брэнд цүнх, бөгж авч өгснөөр аавыгаа Ерөнхий сайдын суудлаас буулгаад буй О.Тэмүүлэн орлогоо нотлуулахаар сарын өмнө Лондон хотоос Монголд ирсэн. Мэдүүлэг ч өгсөн.
Тодруулбал, Л.Оюун-Эрдэнийг хүү болон хадмуудын хамт шалгах, орлогыг нь нотлох хүсэлтийг иргэн Ц.Лут-Очир АТГ-т өнгөрсөн тавдугаар сарын 13-нд ирлүүлсэн байдаг. Улмаар холбогдох хүмүүсийг шалгаж эхэлсэн. Тиймээс О.Тэмүүлэн өнгөрсөн сарын 21-нд Монгол Улсад ирж, АТГ-т мэдүүлэг өгөөд байгаа. Мөн бусад холбогдох хүмүүсээс баримт материалуудыг гаргуулан авч, байцааж, Ерөнхий сайд асан Л.Оюун-эрдэнийн хөрөнгө орлогын мэдүүлгийг шалгаж эхэлсэн.
Эдгээр шалгалтаар нотлогдсон зүйлсийг АТГ хуулийн дагуу сунгасан 30 хоногтоо багтаан мэдээлэх ёстой. Энэ хугацаа нь ирэх сарын дунд үеэр дуусах чигтэй байна.
-Орлого нотлох шалгалтын ажиллагаа юу болов-
АТГ шалгалтыг албан ёсоор өнгөрсөн тавдугаар сарын 23-наас эхэлж шалгаж эхэлсэн.
Бидэнд олдсон мэдээллээр, орлого нотлохтой холбогдуулан Б.Баатар 12 удаа, О.Тэмүүлэн зургаан удаа, Л.Оюун-Эрдэнэ нэг удаа утсаар мэдүүлэг өгчээ. Мөн А.Амундра нарын бусад хүмүүс ч мэдүүлэг өгсөн гэх мэдээлэл байна.
Үүгээр О.Тэмүүлэн нь “Хэро энтертаймент” компанитай хамтарч, өөрийн компаниар орлого олсон нь нотлогдсон гэгдэж буй аж. Б.Баатар зургаан жилийн турш 6.8 тэрбум төгрөгийн орлого олсноо бүрэн нотолсон гэх мэдээлэл байна.
Гэвч АТГ шалгалтын ажиллагааг 30 хоногоор сунгаад байгаа.
Үүнийг О.Тэмүүлэнгийн найз охиндоо авсан бөгжний үнэ тогтоох машиныг гаднаас ирүүлж, шалгахаар болсонтой холбон тайлбарлаж байгаа аж. Уг нь О.Тэмүүлэн сүйн бөгжөө монголоос авсан бөгөөд үнийг дэлгүүр нь нотолж болох байжээ.
Мөн Соёлын яамнаас хэрэгжүүлсэн "Go mongolia" хөтөлбөрийн хүрээнд Ч.Номин Соёлын сайд байхдаа О.Тэмүүлэнгийн контент үйлдвэрлэдэг компанид "Ажил өгч" давуу байдал олгосон талаар мэдээлэл гарсан.
Тэгвэл шалгалтын явцад Ч.Номин сайд болон Go Mongolia-тай холбоотой сэжүүр гараагүй. Тиймд АТГ уг асуудлаар Ч.Номин сайдаас мэдүүлэг аваагүй байна.
-О.Тэмүүлэнгийн орлогын эх үүсвэр-
Шалгалтаар О.Тэмүүлэн өөрөө энтертайнмент чиглэлээр үйл ажиллагаа явуулдаг компанитай. Тэрээр өөрийн компаниараа аав Л.Оюун-Эрдэнийнх нь 50 хувь эзэмшдэг “Хэро энтертайнмент”-тай хамтарч ажилладаг гэдгээ нотлуулж буй аж.
Тэгэхээр түүний орлогын эх үүсвэр нь өөрийн байгуулсан компаниараа “Хэро энтертайнмент”-тай хамтран хийсэн төслөөс улбаатай болж таарах нь.
Ерөнхий сайд асан Л.Оюун-Эрдэнийн ХОМ-д "Хүлэг контент" гэх компани бий. “Хүлэг контент” нь 2016 онд байгуулагдсан. Бизнесийн чиглэлээр зөвлөгөө өгөх зөвшөөрөлтэй компани бөгөөд захирлаар нь түүний гэргий Б.Туул ажилладаг.
Мөн Л.Оюун-Эрдэнэ "Миний том хүү студийн чиглэлээр үйл ажиллагаа явуулах сонирхолтой, тэр чиглэлээр юм хийдэг" гэж мэдэгдэж байсан. Энэ хүрээнд opendata нээлттэй мэдээллийн сангаас хайж үзэхэд, хүү О.Тэмүүлэнгийнх нь нэр дээр "Хүлэг контент энтертайнмент" гэх компани бүртгэлтэй байдаг.
Тус компани нь,
Уран сайхны болон баримтат кино хийх
Гэрэл зураг авах үйлчилгээ
Дуу, дүрс, бичлэг хийх зэрэг хэд хэдэн чиглэлээр үйл ажиллагаа явуулдаг байна.
О.Тэмүүлэнгийн хувьд, 2021 онд Шинэ Эрин олон улсын сургуулийг төгссөн ч дотоодын их сургуульд суралцаагүй. Өнгөрсөн өвлөөс АНУ-ын Харвардын их сургуулийн хэлний бэлтгэлд хамрагдан суралцаж буй. Харин энэ зуурт буюу 2024 оны зунаас энтертайнмент салбарт хүч үзэж, хувиараа гэрэл зургийн студи ажиллуулдаг залуустай ч танил болжээ. Тус салбарынхан О.Тэмүүлэнг 2024 оны есдүгээр сараас мэддэг болсон байна.
BY О. Соёлмаа
СУИС РТМУС-ийг 2021 онд төгссөн. Сэтгүүлзүйн салбарт гурван жил ажиллаж байгаа. Нийгэм, Улс төрийн чиглэлээр дагнан ажилладаг.

Нийтэлсэн огноо2025-06-24