Монгол Улсын Ерөнхийлөгч У.Хүрэлсүх Ерөнхий сайд Н.Учрал, Сангийн сайд З.Мэндсайхан нартай уулзаж, Оюу толгойн ногдол ашгийн талаар байр сууриа илэрхийлэв. Ерөнхийлөгч иргэд Оюу толгойн ногдол ашгийг бэлнээр, дансаараа авах саналыг олноороо дэмжсэн учраас иргэдийн санаачилгыг хүндэтгэж, бодлого шийдвэртэй тусгаж ажиллах нь зүйтэй гэдгийг сануулсан юм. 
Тэрээр "Монголын ард түмний баялаг болох Оюу толгойн ногдол ашгийг хэрхэн зарцуулах асуудал өнөөдөр олон нийтийн анхаарлын төвд байна. Нийтийн өргөдөл, гомдлын системд 100 мянга гаруй иргэн ногдол ашгаа шууд хүртэх санал гаргасан. Иргэдийн зүгээс ногдол ашгийг бэлнээр, өөрсдийн дансаар дамжуулан авах хүсэлтийг олноороо дэмжиж байгаа учраас энэ санаачилгыг хүндэтгэж, бодлого, шийдвэртээ тусгах нь зүйтэй.
Дэлхий дахинд бараа бүтээгдэхүүний үнэ өсөж, бензин, шатахууны хомсдол, тээвэр, ложистикийн саад бэрхшээл, дайн тулаан зэрэг нь улс орнуудын эдийн засагт сөргөөр нөлөөлж байна. Энэ нөхцөл байдал манай улсын эдийн засаг, иргэдийн амьдралд ч шууд нөлөөлж, өрхийн худалдан авах чадвар буурч, бид эдийн засгийн томоохон сорилттой нүүр тулж байна.
Ийм үед Монгол Улсын Ерөнхийлөгчийн хувьд баялгийн өгөөжийг иргэн бүрд хүртээх нь цаг үеийн шаардлагад нийцсэн шийдвэр гэж үзэж байна. Тиймээс Оюу толгойн ногдол ашиг болох 3 их наядаас орж ирсэн тухай бүрд нь иргэдийн дансанд шилжүүлэх нь зүйтэй. Төр, засгийн зүгээс иргэдэд эдийн засгийн хүндрэл, хямралыг даван туулахад нь дэмжлэг үзүүлэх шуурхай арга хэмжээ авч, эдийн засгийн өсөлтийг нэмэгдүүлэхэд онцгой анхаарах шаардлагатай” гэлээ.

Сандэлгэр ЗОЛЗАЯА

С.Золзаяа нь 2022 онд МҮИС-ийг сэтгүүлч мэргэжлээр төгссөн. 2024 оноос iToim.mn сайтад сэтгүүлчээр ажиллаж байна.

Нийтэлсэн огноо2026-11-03