Манай улс БНХАУ-ын хиллэдэг авто замын хоёр талын 9 боомтоор энэ сарын 3-ны байдлаар уул уурхайн 94,5 сая тонн ашигт малтмалын бүтээгдэхүүн тээвэрлэжээ.

Ингэхдээ 91,7 сая тонн буюу 97 хувь нь нүүрс, мөн бусад төрлийн ашигт малтмалын бүтээгдэхүүн 2 хувь, хоёр талын 5 боомтоор улс хооронд 197,218 зорчигч тээвэрлэснийг Олон улсын авто тээврийн харилцааны тухай Монгол Улс болон БНХАУ-ын Засгийн газар хоорондын хэлэлцээрийг хэрэгжүүлэх хамтарсан хорооны хурлын үеэр танилцуулав.

Хурлыг нээж ЗТЯ-ны Авто тээврийн бодлого зохицуулалтын газрын дарга Э.Мөнхнасан хэлэхдээ “Монгол Улс, БНХАУ-ын хоорондын иж бүрэн стратегийн түншлэлийн харилцаа, хамтын ажиллагаа бүх салбарт өргөжин хөгжиж буйн нэг илрэл нь хоёр улсын хоорондын гадаад худалдаа хурдтай өсөж, эдийн засгийн харилцаа эрчимжиж буй явдал. Үүнийг дагаад тээврийн хамтын ажиллагааг өргөжүүлэх, үр ашгийг дээшлүүлэх, тээвэрлэгчдэд таатай нөхцөл бүрдүүлэх үүрэг оногдож байна. Монгол Улс авто тээврийн үйл ажиллагааг хөнгөвчлөх чиглэлээр олон улсын гэрээ хэлэлцээрт нэгдэх, авто тээврийн харилцааг өргөжүүлэхэд анхаардаг. Олон улсын тээвэр хийх нөхцөлийг сайжруулахаар олон улсын чанартай авто зам, үйлчилгээний дэд бүтцийг сайжруулах, зарим үйлчилгээг цахим болгож байна. Бид хоёр улсын тээврийн байгууллагын хамтын ажиллагаа, мэдээлэл солилцох, харилцан ойлголцлыг бэхжүүлж, тулгамдсан асуудлыг шуурхай шийдэхэд хамтран ажиллахад бэлэн” гэлээ.

Хурлын үеэр хоёр улсын худалдаа, эдийн засгийн харилцаа, олон улсын авто тээврийн нөхцөл байдлын тухай мэдээлэл солилцов. Монгол Улсын Засгийн газраас хилийн боомтуудыг хөгжүүлэх, иргэд зорчигчдод тав тухтай зорчих нөхцөл бүрдүүлэх, хилийн нэвтрүүлэх чадварыг сайжруулах, төв суурин газрыг хатуу хучилттай замаар хилийн боомттой холбож байна.

Харин БНХАУ-ын талаас Монголын талд зорчих зөвшөөрлийн бичиг ашиглах нөхцөл байдлыг системтэй нэгтгэн дүгнэж, нэмэлт зөвшөөрөл авах шаардлагаа тайлбарлан, хоёр талын тээвэрлэгчдийн эрх ашгийг харгалзаж, зах зээлийн шударга, эмх цэгцтэй дэг журмыг хамтран сахин хамгаалахыг санал болгожээ.

Түүнчлэн монголын тээврийн хэрэгсэл БНХАУ руу, мөн тэндээс ачаа тээвэрлэхийн тулд мэдээллээ хятадын талд нэг удаа бүртгүүлж, гаалийн хяналтын бүс рүү картаар нэвтэрдэг. Энэ карт нь зөвхөн тухайн боомтоор нэвтрэхэд үйлчилдэг, өөр боомтоор тээвэр хийхийн тулд өмнөх картаа хүчингүй болгож, дахин карт авахыг шаарддаг. Хятадын Гаалийн байгууллага хилээр нэвтрэх картыг хариуцдаг тул асуудлыг шалгаж зохицуулахын тулд Монголын талаас тээврийн хэрэгсэл, картын дугаар, хилээр орж гарсан хугацааны мэдээллийг гаргаж өгөхийг хүсэв.

Мөн Гашуунсухайт-Ганцмод боомтын чиглэлд нүүрс тээвэрлэх тоо хэмжээг нэмэх, Хятадын нутаг дэвсгэр дэх улс хоорондын авто замын хураамж, 2027 оны зорчих зөвшөөрлийн бичгийг солилцох тухай ч хэлэлцжээ. 

Нийтэлсэн огноо2026-11-05