Хот байгуулалт, барилга орон сууцжуулалтын сайд Э.Бат-Амгалангийн мэдээлснээр “Солонго-1,2” орон сууцны сонгон шалгаруулалтыг арилжааны банкуудаар хийлгэхээр болжээ. Сонгон шалгаруулалтыг 100 хувь цахимаар зохион байгуулах юм байна. Одоогоор арилжааны банкныханд төрийн орон сууцны сонгон шалгаруулалтыг хариуцах болсон талаар мэдээлэлгүй байгаа юм.  Түрээслэх, түрээслээд өмчлөх хэлбэрээр “Солонго-1,2” орон сууцыг иргэдэд олгоно.

Анх энэхүү сонгон шалгаруулалтыг наймдугаар сард зохион байгуулна гэж салбарын сайд нь мэдэгдсэн ч удаа дараа хойшилсоор ирэх арванхоёрдугаар сар болоод байна.

“Солонго-1,2” төслийн хүрээнд эхний ээлжинд 2042 айлын орон сууц ашиглалтад ороод буй. Ирэх жил мөн 2000 гаруй айлын орон сууцыг ашиглалтад оруулна. Үүнд зорилтот бүлгийнхэн буюу ахмад настан, хөгжлийн бэрхшээлтэй иргэн, олон хүүхэдтэй өрх, өрх толгойлсон эцэг, эх, төрийн албан хаагч гэсэн статусаар сонгон шалгаруулж орон сууцанд хамруулах бодлого барьж буй.

“Солонго-1” орон  сууцны 1м2-ын үнийг 3.9 сая төгрөгөөр тогтоосон. Тухайлбал, 45 м2 байрыг түрээслэх бол сарын 700 мянган төгрөг, харин түрээслээд өмчлөх бол сар бүр 1,500,000 төгрөг төлнө. Үүний 700 мянга нь түрээсийн төлбөр бол 800 мянга нь орон сууцны үндсэн төлбөрт бодогдох юм.  Түрээслээд өмчлөх орон сууцыг 20 жилийн хугацаатай гэрээ байгуулан, сар бүр дээр заасан төлбөрийг төлж байхаар журмыг гаргасан талаар албаныхан тодотгоод байгаа.

Г.ХОРОЛ

Нийтэлсэн огноо2026-11-07