Нүүрсний галт тэрэг хотын төвөөр явахаа болино www.itoim.mn
Багахангай–Хөшигийн хөндий–Толгойт чиглэлийн шинэ төмөр замаар Нийслэлийн дулааны цахилгааны станцуудын нүүрсийг ирэх сарын 20-ноос тээвэрлэж эхэлнэ.
Улаанбаатарыг өмнө талаар нь тойрох уг шинэ төмөр зам нь хотын төвөөр огт дайрахгүй. Харин Богд уулын урдуур хотыг тойроод баруун талд нь гол шугамтай эргэн нийлнэ. Ингэж явсаар хотын баруун хэсэгт байрлах ТЭЦ 3,4 дүгээр цахилгаан станцыг нүүрсээр хангах аж.
Зам тээврийн сайд Б.Дэлгэрсайхан: “Манай төмөр замчид Хөшигийн хөндийн төмөр замыг ашиглалтад оруулсан бол энэ удаад нүүрс тээвэрлэх төмөр замыг ашиглалтад оруулж байна. Энэ бол 17–18 км урт төмөр зам. Туулын гүүрээс хойш салаад Толгойт руу нийлж байгаа. Толгойтын замыг маргааш холбоно. Энэ нь Улаанбаатар хотын 3, 4 дүгээр цахилгаан станцыг нүүрсээр хангах хамгийн гол зам болно" гэв.
Шинэ зам ашиглалтад орсноор шатахуун, тэсэрч дэлбэрэх бодис зэрэг 34 нэр төрлийн аюултай ачааг хотын дундуур тээвэрлэхээ болино. Цаашид энэ замаар эхний жилд 20 сая тонн, дараа нь 25 сая тонн ачааг хотыг тойруулж тээвэрлэх тооцоотой байна. Энэ нь хоногт 1,800 орчим том оврын машин хотын хөдөлгөөнд оролцохгүй гэсэн үг юм.Түүнчлэн Нийслэлд төмөр зам, авто зам огтлолцдог 14 гарам бий. Тэнд галт тэрэг өнгөрөх бүрт хөдөлгөөн хаагдаж, хоногт дунджаар 144 минут саатдаг байв.Уг зам явж эхэлсэнээр энэ хугацаа 21–120 минутаар буурах аж.
Ташрамд дурдахад, шинэ замтай холбогдуулан Эмээлтийн хуучин пост байсан газарт нүхэн гарц барьж, есдүгээр сарын 15-нд ашиглалтад оруулсан. 2027 онд Эмээлтийн постыг Аргалант руу, Налайхын постыг Төв аймгийн нутаг руу шилжүүлэхээр төлөвлөж байна.
Нийтэлсэн огноо2026-11-16





