Гэр бүл, хөдөлмөр, нийгмийн хамгааллын сайд Л.Энх-Амгалан Засгийн газраас гаргасан шийдвэрийг танилцуулж шийдвэр гаргалаа. Тэрээр "Засгийн газар 2019 онд 57 дугаар тогтоолоо баталж тавдугаар сарын 1-нээс арваннэгдүгээр сарын 1-ний хооронд л хурдан морины уралдаан зохион байгуулахыг зөвшөөрөх шийдвэр гаргасан. Харин өнөөдөр Засгийн газар орон нутаг нь өөрөө шийдвэр гаргаж зохион байгуулдаг байх шийдвэр гаргаж байна. Үүнтэй холбоотойгоор Гэр бүл, хөдөлмөр, нийгмийн хамгааллын сайдын өмнөх тушаалд өөрчлөлт оруулах шаардлагатай болж байна. Хүүхдийн эрхийг хамгаалах чиглэлээр төрийн бус байгууллагууд, Монголын морин спорт, уяачдын холбоотой хэд хэдэн удаа уулзалт хийгээд тушаалаа гаргана. Хамгийн түрүүнд нэг, хоёрдугаар сард зохион байгуулж байгаа хууль бус уралдаануудыг таслан зогсоох хэрэгтэй. Хууль бусаар уралдаан зохион байгуулсан хүмүүст эрүүгийн хариуцлага хүлээлгэдэг зохицуулалт хийнэ.

Мөн орон нутаг өөрөө шийдвэрлэнэ гэж байгаа боловч хаврын уралдааныг гуравдугаар сарын 1-нээс хойш зохион байгуулах хэрэгтэй. Засгийн газар хугацааг тогтоохгүй ч ингэж зөвлөнө.

Түүнчлэн 12-оос дээш насны хүүхдээр хурдан морь унуулах ёстой" гэв.