ХСҮТ: Агаарын бохирдол уушгины хавдар үүсгэж байгаа нь тогтоогдоод байна

Хорт хавдрын улмаас нас барсан хүний тоо сүүлийн гурван жил дараалан 2000 давсан үзүүлэлттэй байгааг Эрүүл мэндийн яамны тайлангаас харж болохоор байна. Тухайлбал: 2024 онд улсын хэмжээнд 2068 хүн, 2023 онд 2072 хүн хорт хавдрын улмаас хорвоог орхижээ.

Нийт нас баралтын таван хүн тутмын нэг нь хорт хавдрын шалтгаантай, 60 орчим хувь нь хорт хавдартай гэж оношлогдсоноос хойш нэг жил хүрэхгүй хугацаанд нас бардаг байна. Учир нь нийт оношлогдсон хүмүүсийн 65 хувь нь хожуу үе шатандаа оношлогджээ. Үүний 87 хувийг 45-аас дээш насныхан эзэлж байгаа аж.

Түүнчлэн Хавдар судлалын үндэсний төвийн амбулаторийн үзлэгийн тоо жил бүр өссөөр байгаа бөгөөд энэ оны нэгдүгээр сарын байдлаар тус төвөөр долоо хоногт дунджаар 3800-4000 хүн үйлчлүүлж, өдөрт 14 хүн хавдрын улмаас нас барж байна гэсэн үзүүлэлт байна. Цаашид энэ хэвээр үргэлжилбэл 2040 он гэхэд өвчлөл хоёр дахин нэмэгдэх тооцооллыг ДЭМБ гаргажээ.

Хорт хавдрын өвчлөл, нас баралтын хандлага дэлхий дахинаа 2040 он гэхэд 70 гаруй хувиар нэмэгдэнэ гэсэн судалгааг ДЭМБ танилцуулаад байгаа юм. Хорт хавдрын нас баралтын судалгаагаар элэгний өвчлөл 37.6 хувь буюу хамгийн их хувийг эзэлж байгаа бол ходоод 16.4 хувь, уушгины хорт хавдрын өвчлөл 6.5 хувийг эзэлж байгаа аж.

Монгол Улс хавдрын нас баралтын тоогоор дэлхийд нэгдүгээрт, хорт хавдрын өвчлөл, нас баралтаар дэлхийн 185 улсаас 52 дугаарт эрэмбэлэгдэж байгааг Хавдар судлалын үндэсний төвийн цээжний хөндийн мэс заслын эмч Б.Ганзориг "Агаарын бохирдол ба эрүүл мэнд" хэлэлцүүлгийн үеэр тодотгож байв.

Мөн агаарын бохирдол уушгины хавдар бий болгодог гэдэг нь тогтоогдсоноос гадна монголчуудад элэгний хавдар үүсэхэд нүүрсний шаталтаас үүсдэг диметильсульфид зэрэг бодис нөлөөлж байгааг олон улсын хамтарсан судлаачид илрүүлснийг тэрбээр онцолж байлаа.

Үүнээс гадна “Агаарын бохирдлыг бууруулах хүрээнд утааны асуудлаарх бодлого, шийдвэрийн хэрэгжилтийн үр дүн, шийдэл” ерөнхий хяналтын сонсголын үеэр УИХ-ын гишүүн Ж.Чинбүрэн “2017-2024 оны байдлаар Монгол Улсад бүртгэгдсэн угаарын хийгээр нас барсан хүний тоог Шүүх шинжилгээний ерөнхий газар гаргасан байна. Тус газраас угаартаж нас барсан иргэдийн тоог 779 гэж хэллээ. Харин Эрүүл мэндийн яамнаас хэлсэн 163 гэдэг тоо бол эмнэлгийн тусламж авах явцдаа нас барсан хүмүүсийн тоо" гэж тодотгосон юм.