I/01-II/02-ны байдлаар улсын хэмжээнд авто тээврээр 6.1 сая тонн, төмөр замаар 3.8 сая тонн, агаарын тээврээр 0.7 мянган тонн ачаа тээвэрлэжээ

Оны эхний нэг сарын хугацаанд төмөр зам, авто болон агаарын тээврээр нийт 9.9 сая тонн ачаа тээвэрлэснийг Зам, тээврийн яам мэдээллээ. Ачаа тээвэрлэлт өмнөх оны мөн үетэй харьцуулахад буурсан үзүүлэлттэй байна. Тодруулбал: төмөр замын ачаа тээвэр 2.2 хувиар, авто тээврийн ачаа 9.9 хувиар, агаарын тээврийнх 18.2 хувиар буурчээ.

Нэгдүгээр сард зургаан сая тонн нүүрсийг авто тээврээр тээвэрлэн, дийлэнхийг нь Гашуунсухайт боомтоор экспортолсон байна. Уул уурхайн бүтээгдэхүүний экспортыг авто тээврээр хийж байгаа нь зардал өндөр байгаагаас гадна 60 гаруй хувийг нь гаднын компаниуд гүйцэтгэж байгаа нь төлбөрийн тэнцэлд алдагдалтай байгааг Монголбанкны Ерөнхийлөгч тодотгож байсан юм.

2024 онд Монгол Улс тээврийн үйлчилгээний төлбөрт 1.3 тэрбум ам.доллар зарцуулсан нь орлогоосоо хоёр дахин давсан үзүүлэлт болсныг Монголбанкны тайланд онцолжээ.

Засгийн газар ойрын хугацаанд гэрээ байгуулахаар хүлээгдэж байгаа Гашуунсухайт-Ганцмод боомтын төмөр замын хил холболтыг хийснээр ачаа тээврийн зардал хоёр дахин буурч, төмөр замаар тээвэрлэх ачааны хэмжээ жилд 30 сая тонноос дээш хэмжээгээр нэмэгдэх, нүүрсний борлуулалтын орлогыг жилд 1.5 тэрбум ам.доллароор нэмэх боломжтойг Аж үйлдвэр, Эрдэс баялгийн яам мэдээлсэн юм.

2025 онд төмөр замаар 50 сая тонн, авто тээврээр 90 сая тонн ачаа тээвэрлэх зорилт тавьсныг Зам, тээврийн яам тодотгож байна.