Геологи, хайгуулын салбарт энэ онд 20 тэрбум төгрөг төсөвлөснөөс 9.1 тэрбум төгрөгийг геологийн зураглал хийхэд зарцуулна
Монгол Улс чухал ашигт малтмал, газрын ховор элементийн зах зээлд байр сууриа эзлэхийн тулд эн тэргүүнд бодлого чиглэлээ тодорхойлох нь чухал байна. Үүний дараа чухал ашигт малтмалын жагсаалтаа гаргаж, хайгуулын ажлыг өргөн хүрээнд хийх шаардлагатай. Мөн хөрөнгө оруулалт татахын тулд хууль эрх зүйн орчин тогтвортой, татварын бодлого тодорхой байх нь чухал болохыг салбарынхан онцолж байна.
Дэлхийн хэмжээнд эрчим хүчний шилжилт хурдацтай өрнөж буй энэ үед Монгол Улс чухал ашигт малтмалын чиглэлд дорвитой бодлого төлөвлөгөөтэй ажиллахгүй бол тус зах зээлийн тоглолтод оролцоход оройтох эрсдэл өндөр байгааг салбарын сайд тодотголоо. Үүнийг эхлүүлэхэд ард түмнийг үнэн зөв мэдээлэл, мэдлэгээр хангах нь чухал болохыг онцолсон юм.
Засгийн газраас Төрийн өмчийн “Монголросцветмет” компанийн нэрийг “Эрдэнэс Критикал Минералс” болгон өөрчилж,  үйл ажиллагааг нь чухал ашигт малтмал руу чиглүүлэхийг мэдээллээ.
Зэс, жонш, газрын ховор элемент, цагаан алтны бүлгийн зэрэг 18 элементийг чухал ашигт малтмалын жагсаалтад багтаах боломжтойг Монголын чухал ашигт малтмалын ассоциаци мэдээлж байсан юм.
Энэ оны нэгдүгээр сарын эцсийн байдлаар ашигт малтмалын тусгай зөвшөөрөлтэй талбайн хэмжээ 6.7 сая га буюу нийт нутаг дэвсгэрийн 4.4 хувийг эзэлж байна.
2025 онд 20 орчим тэрбум төгрөгөөр хайгуул судалгааны ажил хийхээр улсын төсөвт тусгаад байгаа юм. Энэ хүрээнд тойм болон сэдэвчилсэн хайгуулын 16 төслийг эхлүүлнэ гэдгийг Үндэсний геологийн алба мэдээллээ.

Нийтэлсэн огноо2025-03-31