Ричард Холтум: Ирээдүйд "Trafigura" дахин ийм луйврын хохирогч болохгүй гэдгийг баталж чадахгүй ч төстэй асуудал гарахаас сэргийлэх “цэвэрлэгээ”-ний ажлаа эрчимжүүлж байна
“Trafigura Group” компани Монголд олон жил үргэлжилсэн луйврын шинжтэй хэргээс 1.1 тэрбум ам.долларын хохирол амссан нь “сургамжтай үйл явдал байлаа” хэмээн тус компанийн шинээр томилогдсон Гүйцэтгэх захирал онцоллоо. 
Нэгдүгээр сард “Trafigura”-ийн Гүйцэтгэх захирлын албан тушаалыг хүлээн авсан Ричард Холтум өнгөрсөн долоо хоногт Швейцарын Лозаннд болсон “FT Commodities Global Summit”-д оролцохдоо дээрх дуулиант явдлын талаар анх удаа ам нээж, зөрүүтэй, сэжигтэй баримт олж харвал нуулгүй илчилж байхыг компанийн харьяалалд байдаг арилжаалагчдад уриалснаа мэдээлсэн байна.
“Хэрэв манай ажилтнууд яагаад гэж асуух зоригтой байсан бол бид үүнийг аль эрт олоод илрүүлчих байлаа” хэмээн тэрбээр онцолжээ.
Монгол Улс дахь “Trafigura Mongolia” салбарынх нь ажилтнууд бичиг баримт засварлаж, хугацаа хэтэрсэн авлагыг санаатайгаар нуун дарагдуулсан байж болзошгүй хэргээс шалтгаалан тус компани 1.1 тэрбум ам.доллароор хэмжигдэх алдагдал хүлээхээр байгаа талаар өнгөрсөн оны аравдугаар сард мэдээлж байлаа. 2023 онд худалдан авсан никель нь “алга болсны” улмаас 500 гаруй сая ам.долларын хохирол амссанаа дэлгээд байсан “Trafigura”-ийн хувьд энэ нь ээлжит том цохилт болсон юм.
Өдөрт 35 мянган баррель газрын тос хэрэглэдэг өчүүхэн зах зээл Монголд ийм үлэмж хэмжээний мөнгө алдаж буйгаа мэдээгүй удсан нь Монгол дахь оффис компанийн төвөөс хэт тусгаарлагдсан, мөн цар тахлаас болж удирдлагууд нь тэнд очих боломж хомс байсантай холбоотойг Ричард Холтум дурдсан байна. Мөн “Trafigira”-ийн ажилтнууд дунд Монголоор ярьдаг хүн цөөхөн учраас “хэлний асуудал” бас нөлөөлсөн болохыг тодотгожээ.
Ирээдүйд “Trafigura” дахин ийм луйврын хохирогч болохгүй гэдгийг баталж чадахгүй ч компанийн зүгээс төстэй асуудал гарахаас сэргийлэх “цэвэрлэгээ”-ний ажлаа эрчимжүүлж байгааг мөн онцолсон байна.
“Энэхүү алдагдал компани дотооддоо өөрчлөлт хийх нүсэр хөдөлгөгч хүч боллоо. Учир нь үүний үр дагаврыг халаасандаа мэдэрч, ийм байдал үргэлжлэх ёсгүй гэдгийг ойлголоо” гэсэн байна.

Нийтэлсэн огноо2025-03-31