Монгол Улс гаднын хиймэл дагуулын түрээсэнд жилд 9.6 сая ам.доллар төлж байна

Монгол Улсад хүн амьдрах боломжтой нийт газар нутгийн 23.8 хувьд нь газрын болон үүрэн холбооны сүлжээ нэвтэрсэн гэдгийг Цахим хөгжил, инновац, харилцаа холбооны яам мэдээллээ. Харин үлдсэн газар нутгийн хувьд ямар нэгэн сүлжээнд холбогдоогүй байгаа аж.

Хэрэв нийт газар нутгийн зөвхөн 60 хувийг хөдөлгөөнт холбооны сүлжээнд холбоно гэж үзвэл үүрэн холбоогоор тооцвол 4G сүлжээний 28 мянга 278 бааз станц байгуулах шаардлагатайг салбарын яам мэдээлж байв. Хөрөнгө оруулалтын зардал нь ойролцоогоор 11 их наяд төгрөг болох ба жил бүр ашиглалтын зардалд 1.7 их наяд төгрөг зарцуулахаар байгааг тодотгож байна.

Монгол Улс нийт 1639 багтай бөгөөд үүнээс 1448 багт үүрэн холбооны сүлжээ нэвтрээд байгаа аж. Нийт багийг шилэн кабелаар холбоход сумаас баг хүртэлх зай дунджаар 29.7 км байх ба нэг км шилэн кабелийн одоогийн суурилуулалтын зардал найман сая орчим төгрөг гэж тооцоход нийт 292 тэрбум төгрөг шаардлагатай. Мөн нийт малчин өрхийг шилэн кабелийн сүлжээнд холбоход 29 их наяд төгрөг шаардлагатай болно гэж үзсэн байна.

Монголчууд одоогийн байдлаар гаднын хиймэл дагуулын түрээсэнд жилд 9.6 сая ам.доллар төлдөг. Үүнийг 15 жилээр тооцвол 144 сая ам.доллар төлнө гэсэн үг юм. Иймд "Үндэсний хиймэл дагуул" төсөл хэрэгжүүлэхээр төлөвлөж байгаа бөгөөд хиймэл дагуул хөөргөн, шилэн кабелиар интернэт ашигласнаар 29 их наяд төгрөг хэмнэх боломжтой гэж үзэж байна.