Монгол, Францын хамтарсан ураны төслийн үр өгөөжийн дийлэнх нь Монгол Улсад ногдох хувилбарыг судалж, тусгай зөвшөөрөл эзэмшигч компанийн төрийн эзэмшлийн хувь, хэмжээг 10 хувийн Төрийн эзэмшлийн давуу эрхийн хувьцаа, ашигт малтмалын нөөц ашигласны тусгай төлбөрөөр орлуулах талаар тогтоолын төслийг хэлэлцэж, УИХ-д өргөн мэдүүлэв

Ураны төслийн хөрөнгө оруулалтын гэрээний хүрээнд стратегийн ач холбогдолтой ордын Төрийн эзэмшлийн хувь хэмжээг АМНАТ-өөр орлуулах тогтоолын төслийг УИХ-д өргөн мэдүүллээ.

Төслийн хугацаанд нийт 5.1 тэрбум ам.долларын орлогыг Монгол Улсад оруулах тооцоотой байна. Тодруулбал: улсын төсөвт нийт 4.4 тэрбум ам.доллар, хуримтлалын санд 593 сая ам.доллар, ирээдүйн өв санд 36 сая ам.доллар зэргийг төвлөрүүлэхээр байгааг ЗГХЭГ-ын дарга мэдээллээ. Мөн орон нутгийн хөгжилд 44 сая ам.доллар зарцуулж, 1600 орчим ажлын байр бий болгоно.

Хөрөнгө оруулалтын гэрээг 20 жилээр байгуулахаар тохиролцсон байна. Бүтээн байгуулалтыг 2028 он хүртэл хийж, эхний ээлжид хөрөнгө оруулагч талаас 500 сая ам.долларын санхүүжилт хийхээр төлөвлөж байгаа аж.

Мөн төслөөс хүртэх бусад үр өгөөжийн хувьд Монгол Улс АМНАТ, ААНОАТ, давуу эрхийн 10 хувийн хувьцааны ногдол ашиг авна.

Цөмийн энергийн тухай хуульд оруулсан өөрчлөлтөөр суурь болон тусгай АМНАТ-ийг тус бүр таван хувь, өсөн нэмэгдэхийг нь зах зээлийн үнээс хамаарч 0-9 хувь байхаар заажээ. Энэ хүрээнд Монголын талын хүртэх өгөөж доод тал нь 15 хувь байна гэж тооцоолж байгаа юм.

Төслийн үр өгөөжид байгаль орчин бохирдуулсан, ус ашигласны төлбөр, нийгмийн даатгалын шимтгэл зэргийг тооцохгүй. Харин “know-how” маркетингийн зардлыг зардал бус үр өгөөжид тооцохоор тохиролцсоныг ЗГХЭГ мэдээллээ. Газар дор уусган баяжуулах технологи ашиглах бөгөөд гурван жил тутамд байгаль орчны аудит хийлгэхээр гэрээнд тусгасан байна.