Нийслэлийн Засаг дарга бөгөөд Улаанбаатар хотын захирагч Х.Нямбаатар Засгийн газрын хуралдаанаар гаргасан шийдвэрийн талаар мэдээлэл хийлээ. Тэрээр "Засгийн газраас 2025 оныг Нийслэлийн дэд бүтцийн хөгжлийг дэмжих жил болгон зарласан тогтоол баталлаа.

Улаанбаатар хотыг 2040 он хүртэл хөгжүүлэх ерөнхий төлөвлөгөөг ирэх долоо хоногийн Засгийн газрын хуралдаанд өргөн мэдүүлнэ. Энэ төлөвлөгөөтэй уялдуулж дэд бүтцийн шинэ төлөвлөлт бий болгоно.

Өнөөдөр Агаар, орчны бохирдлыг бууруулах үндэсний хорооны анхдугаар хуралдаан болно. Энэ хуралдаанаар Улаанбаатар хотын агаарын бохирдлыг бууруулах урт болон богино хугацааны төлөвлөгөөг батлуулна. Энэ төлөвлөгөөг хэрэгжүүлэхэд Засгийн газар бүх талаар дэмжлэг үзүүлэх зорилгоор өнөөдрийн тогтоолоо баталлаа.

Ирэх жил Улаанбаатар хотын 20 мянган айлыг хийн шугам сүлжээнд холбоно. Цаашлаад яндангүй бүсчлэл тогтооно. Энэ бүсэд хийн болон керосин зуухыг хэрэглээнд нэвтрүүлнэ. Бусад бүсийн айл өрхүүдэд давхар шаталтад зуух тараахаар төлөвлөж байгаа" гэлээ.